បុរស៣នាក់បានប្ដឹងសុំឲ្យនគរបាលប៉ុស្ដិ៍កាកាបជួយអន្តរាគមន៍រកយុត្តិធម៌ជូនពួកគាត់កាលពីវេលាម៉ោង៥ និង១០នាទីល្ងាច ថ្ងៃទី៨ ខែវិច្ឆិកា ឆ្នាំ២០១៧ ដោយពួកគាត់បាន ការចោទប្រកាន់ទៅលើថៅកែហាងផឹកស៊ីខារ៉ាអូខេមួយកន្លែងយីហោ《ហ្គោលឌិនសោន KTV》ដែលមានទីតាំងស្ថិតនៅក្នុងតាមបណ្ដោយផ្លូវលេខ២០០៤ ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យថា បានគាបស៊ីពួកគាត់ដោយចេញវិក្កយបត្រគិតលុយបំប៉ោងតួលេខស្រាបៀរ និងមុខម្ហូប កាប់ឆៅកោរអត់ដាក់ទឹកតែម្ដង។
បុរសទាំង៣នាក់នោះបានសុំលាក់មិនប្រាប់ឈ្មោះនោះឡើយ ពួកគាត់បាននិយាយប្រាប់នគរបាលថា នៅល្ងាចថ្ងៃទី៧ ខែវិច្ឆិកា ឆ្នាំ២០១៧ ពួកគាត់បាននាំគ្នាផឹកស៊ីនៅខាងក្រៅ ហើយម្នាក់ៗបានស្រវឹងខ្លាំងទៅហើយ ប៉ុន្តែមិនមែនស្រវឹងរហូតលែងដឹងអីនោះទេ តែដោយសារចង់សប្បាយ នៅវេលាយប់ថ្ងៃដដែលពួកគាត់ក៏បាននាំគ្នាបន្តដំណើរទៅផឹកនៅហាងនោះទៀត។ ហើយពេលទៅដល់មិនបានចាប់អារម្មណ៍ថា មានបញ្ហាបែបនឹងកើតឡើងឡើយ ពួកគាត់ក៏បានហៅស្រាបៀរ និងមុខម្ហូបក្លែមមួយចំនួនមកហូបបន្ត ប៉ុន្តែដោយសារតែស្រវឹងស្រាប់ហើយនោះ ពួកគាត់មិនអាចផឹកស៊ីបានច្រើនបានទៀតឡើយ ហើយក៏រឹតតែមិនហ៊ានហៅស្រា និងម្ហូបមកច្រើនឡើយព្រោះលុយមានតិចផង។
ប្រភពដដែលបានបន្តទៀតថា លុះក្រោយពេលឈប់ផឹកស៊ី ពួកគាត់បានឲ្យថៅកែហាងគិតលុយ ពេលនោះបុគ្គលិកហាងយកវិក្កយបត្រមកឲ្យពួកគាត់ ខណៈនោះគ្រាន់តែទទួលយកមកមើលហើយ មានការហួសចិត្តយ៉ាងខ្លាំងស្ទើរដាច់ផ្ងារ និងរកនឹកស្មានមិនដល់ឡើយ។ ពួកគាត់មានការភ្ញាក់ផ្អើលយ៉ាងខ្លាំង ព្រោះពិនិត្យនៅនៅក្នុងវិក្កយបត្រនោះពួកគាត់ផឹកស្រាបៀរ អស់ដល់ទៅ៦កេស និង ម្ហូបដល់ទៅ១២មុខ ហើយគិតជាប្រាក់ចំនួន៣៣១ដុល្លារឯណោះ។ ដែលចំនួនស្រាបៀរ៦កេសសម្រាប់ពួកគាត់ដែលស្រវឹងស្រាប់ហើយកុំថាឡើយដល់ទៅផឹក សូម្បីតែងូតទៀតក៏មិនអស់ដែរ បន្ទាប់ពីឃើញបែបនេះពួកគាត់បានប្រាប់ទៅថៅកែហាងឲ្យគិតលុយម្ដងទៀតក្រែងមានការភាន់ច្រឡំ ប៉ុន្តែថៅកែហាងបានបញ្ជាក់ថាអត់ច្រឡំទេ គឺនេះជាចំនួនពិតប្រាកដហើយ។
ប្រភពខាងលើបានបន្តទៀតថា គ្រាន់តែបានឃើញចំនួនតួលេខបំប៉ោងបែបនេះ ពួកគាត់បានស្វាងស្រវឹងគ្រប់ៗគ្នា ហើយដោយសារអត់លុយគ្រប់ចំនួន ដើម្បីទូទាត់ថៅកែហាងមិនបានអនុញ្ញាតឲ្យពួកគាត់ចេញទៅផ្ទះនោះឡើយ។ពេលនោះពួកគាត់គ្មានមធ្យោបាយអ្វីផ្សេងក្រៅតែពីការយកម៉ូតូទៅដាក់បញ្ចាំនោះទេ ហើយក្រោយពេលយកម៉ូតូដាក់ឲ្យថៅកែហាងនោះ ទើបថៅកែហាងអនុញ្ញាតឲ្យចាកចេញពីហាងទៅផ្ទះ លុះរហូតដល់វេលាល្ងាចថ្ងៃទី៨ ខែវិច្ឆិកា ទើបពួកគាត់ធ្វើដំណើរទៅកាន់ប៉ុស្ដិ៍នគរបាល រដ្ឋបាលកាកាបដាក់ពាក្យបណ្ដឹងសុំឲ្យនគរបាលជួយតែម្ដង។
ក្រោយពេលទទួលបានបណ្ដឹងនគរបាលប៉ុស្ដិ៍ខាងលើ បានចុះទៅកាន់ហាង《ហ្គោលឌិនសោន KTV》នោះដើម្បីសួរនាំដល់ម្ចាស់ហាងដែលជាប់ចោទថា គាបស៊ីគិតលុយកាប់សាច់កោរអត់ដាក់ទឹក ពីភ្ញៀវដែលទាំង៣នាក់នោះ។ ពេលទៅដល់តំណាងម្ចាស់ហាងនោះបាននិយាយថា បុរសទាំង៣នាក់នោះពិតជាបានផឹកស៊ីអស់ស្រាបៀរចំនួន៦កេស និងសាច់ក្លែម១២មុខ គិតជាទឹកប្រាក់ចំនួន៣៣១ដុល្លារពិតមែន ទើបចេញវិក្កយបត្រប៉ុណ្ណឹង។ ប៉ុន្តែទោះបីមានការបកស្រាបបែបនេះក្ដី ហាងខាងលើកំពុងទទួលរងនូវការរិះគន់យ៉ាងចាស់ដៃ ព្រោះតែតួលេខនោះរកជឿមិនបានឡើយ ហើយពេលនោះនគរបាលគ្មានវិធីអ្វីដើម្បីរកការពិតបានទៀត។
ចំណែកបុរសទាំងនោះដោយមើលទៅ ចាញ់តែមម្ចាស់ហាងតាំងពីដំបូងរហូតមកហើយនោះ និងមើលទៅនគរបាលក៏ពិបាកដោះស្រាយទៀតនោះ ពួកគាត់ក៏បានសម្រេចចិត្តទូទាត់ប្រាក់ចំនួន៣០០ដុល្លារទៅឲ្យម្ចាស់ហាង ហើយម្ចាស់ហាងក៏បានយល់ព្រមទទួលយកចំនួន៣០០ដុល្លារនោះ ដោយចុះថ្លៃឲ្យ៣១ដុល្លារ និងបានប្រគល់ម៉ូតូទៅឲ្យបុរសទាំង៣នាក់នោះវិញជាការបញ្ចប់រឿង៕
0 comments:
Post a Comment