កំពង់ឆ្នាំង៖ ដំណើរការត្រួតពិនិត្យឯកសារមិនប្រក្រតីរបស់ជនបរទេសក្នុងខេត្តកំពង់ឆ្នាំងបានសម្រេចប្រមាណជា ៥០ ភាគរយហើយ ខណៈមានឯកសាររាប់ពាន់ច្បាប់ត្រូវបានដកហូតពីជនជាតិវៀតណាមរស់នៅលើបឹងទន្លេសាប។
ក្នុងរយៈពេល ៨ ថ្ងៃចុងក្រោយនេះមន្ត្រីនគរបាលអន្តោប្រវេសន៍ខេត្តកំពង់ឆ្នាំង និងក្រសួងមហាផ្ទៃបានត្រួតពិនិត្យឯកសារជនជាតិវៀតណាមបានចំនួន ១៧៣៣ គ្រួសារក្នុងចំណោម ២៣៩៣ គ្រួសារដែលមានមនុស្សសរុបចំនួន ១០០ ០៨៧ នាក់នៅក្នុងខេត្តកំពង់ឆ្នាំង។ ក្នុងនោះបានដកហូតឯកសារដែលមានភាពមិនប្រក្រតីបានរាប់ពាន់ច្បាប់ដូចជាសៀវភៅគ្រួសារ,សំបុត្រកំណើត,អត្តសញ្ញាណប័ណ្ណសញ្ជាតិខ្មែរ និងសំបុត្រអាពាហ៍ពិពាហ៍ជាដើម។ នេះបើតាមលោក ប៉ាន់ ឡៃឃាង ប្រធានការិយាល័យគ្រប់គ្រងជនបរទេសនៃស្នងការដ្ឋានខេត្តកំពង់ឆ្នាំង។
លោក ឡៃឃាង បានប្រាប់ភ្នំពេញ-ប៉ុស្តិ៍ពីម្សិលមិញថា៖ «យើងអនុវត្តបានប្រមាណជា ៥០ ភាគរយហើយដែលមាន ១៧៣៣ គ្រួសារ។ ជាង ១៧០០ ហ្នឹង បើគិតទៅវាមាន [ឯកសារ] រាប់ពាន់ច្បាប់ត្រូវបានដកហូត»។
ទោះយ៉ាងណាលោកមិនបានបញ្ជាក់ប្រាប់ពីចំនួនឯកសារដកហូតជាក់លាក់នោះទេ ដោយលោកថាដំណើរត្រួតពិនិត្យ និងដកហូតនៅមិនទាន់ចប់នៅឡើយ បន្ទាប់ពីបានចាប់ផ្តើមកាលពីថ្ងៃទី ២៣ ខែវិច្ឆិកាកន្លងមក។
អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃបានឲ្យដឹងក្នុងកិច្ចប្រជុំផ្សព្វផ្សាយស្តីពីការលុបចោល និង ដកហូតឯកសាររដ្ឋបាលកម្ពុជាមិនប្រក្រតីកាលពីខែតុលាកន្លងមកថាប្រទេសកម្ពុជាមានជនអន្តោប្រវេសន៍ខុសច្បាប់ជាង ៧ ម៉ឺននាក់ដែលមានសញ្ជាតិចំនួន ៥ ផ្សេងគ្នាក្នុងនោះតួលេខជនជាតិវៀតណាមមានច្រើនជាងគេរហូតដល់ទៅជាង ៩០ ភាគរយ។
លោក ប៉ាន់ ឡៃឃាង ក៏បានឲ្យដឹងផងដែរថាបន្ទាប់ពីត្រូវដកហូតឯកសារហើយមន្ត្រីនគរបាលនឹងបំពេញបែបបទជូនពួកគាត់ជាជនអន្តោប្រវេសន៍ហើយយកទៅដាក់ពាក្យនៅក្រសួងមហាផ្ទៃដើម្បីឲ្យក្រសួងចេញប្រកាសទទួលស្គាល់ពួកគាត់ជនអន្តោប្រវេសន៍ស្របច្បាប់រស់នៅកម្ពុជា។
លោកថា៖ «ពាក់ព័ន្ធនឹងឯកសារមិនប្រក្រតីហ្នឹងយើងត្រូវដកហូត ហើយឲ្យគាត់បំពេញទៅតាមនីតិវិធីនៃច្បាប់យើងដើម្បីទទួលបានការប្រកាសទទួលស្គាល់ស្របច្បាប់។ ការងារនេះក៏ត្រូវមានការត្រួតពិនិត្យច្រើនតាមផ្លូវច្បាប់ដែរ»។
លោក ប៉ាល់ សូត្រ ស្នងការរងនគរបាលខេត្តកំពង់ឆ្នាំងទទួលបន្ទុកគ្រប់គ្រងជនបរទេសបានឲ្យដឹងផងដែរថាក្រោយពេលដាក់ពាក្យទៅក្រសួងមហាផ្ទៃរួច សេចក្តីប្រកាសមួយនឹងត្រូវចេញប្រមាណជា ១ ខែក្រោយមក។ ក្រោយពេលទទួលបានសេចក្តីប្រកាសទទួលស្គាល់ជាជនអន្តោប្រវេសន៍ស្របច្បាប់ហើយ ជនអន្តោប្រវេសន៍ទាំងនោះនឹងអាចដាក់ពាក្យស្នើសុំចូលសញ្ជាតិខ្មែរនៅរយៈពេល ៧ ឆ្នាំក្រោយមក។ ក្នុងអំឡុងពេលនោះក៏មានការបង់អាករក្នុងនាមជាជនអន្តោប្រវេសន៍ផងដែរ។ លោកស្នងការរងសុំមិនធ្វើអត្ថាធិប្បាយបន្តនោះទេដោយសារជាប់រវល់។
កាលពីពេលកន្លងមក មន្ត្រីអាជ្ញាធរធ្លាប់បានប្រាប់ភ្នំពេញ ប៉ុស្តិ៍ថាដើម្បីទទួលបានភាពស្របច្បាប់ក្នុងការរស់នៅកម្ពុជាគឺជនបរទេសទាល់តែមានសេចក្តីប្រកាសទទួលស្គាល់របស់ក្រសួងមហាផ្ទៃ។
បន្ទាប់មកបុគ្គលនោះត្រូវសុំប័ណ្ណស្នាក់នៅអចិន្រៃ្តយ៍ពីការិយាល័យអន្តោប្រវេសន៍ និងស្ថាប័នរដ្ឋ។ នៅពេលបានប័ណ្ណស្នាក់នៅហើយពួកគាត់ត្រូវមានកាតព្វកិច្ចបង់ពន្ធ ឬអាករជូនរដ្ឋទៅតាមច្បាប់កំណត់គឺ ២៥ ម៉ឺនរៀលក្នុងម្នាក់រៀងរាល់ ២ ឆ្នាំម្តង។
ភ្នំពេញ ប៉ុស្តិ៍ បានផ្ញើសារសុំអត្ថាធិប្បាយពីនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ប៉ុន្តែលោកមិនទាន់បានឆ្លើយតបទេកាលពីម្សិលមិញ៕
0 comments:
Post a Comment