ខេត្តព្រៃវែង ៖ គិតមកត្រឹមរសៀលថ្ងៃទី១៨ មករា ២០១៨នេះ រឿងរ៉ាវបន្លំខ្លួនជាកូនកំលោះ លបឡើងទៅរួមរ័កជាមួយកូនក្រមុំ ឯកូនក្រមុំនឹកស្មានថា ជាអនាគតប្តី ក៏បណ្តោយខ្លួនឱ្យប្រុសកំហូចរួមរ័កដល់ទៅ៣ដង ក្នុង១យប់នោះ ពេលនេះ ធ្វើឱ្យសាមីខ្លួនជាកូនកំលោះសម្រេចរំសាយមង្គលការ រួចវេចបង្វេចត្រឡប់ទៅផ្ទះដោយទាមទារបណ្ណាការពីម្តាយខាងស្រី ចំនួន១,៤០០ដុល្លារមកវិញ ។
ហេតុការណ៍ដ៏គួរឱ្យដ៏គួរឱ្យហួសចិត្តនេះបានកើតឡើងកាលពីវេលាម៉ោង៦ព្រឹក ថ្ងៃទី១៦ ខែមករា ឆ្នាំ២០១៨ នៅចំណុចផ្ទះរៀបមង្គលការមួយកន្លែង ស្ថិតក្នុងភូមិឆ្ពឹះ ឃុំថ្មពូន ស្រុកកញ្ជ្រៀច ។
ទោះជាយ៉ានេះក្តីក្រុមគ្រួសារខាងស្រី បានអះអាងថា គ្មានលុយទេ ព្រោះចាត់ចែងពិធីមង្គលការអស់ហើយ ទើបធ្វើឱ្យរឿងមួយនេះកំពុងកើតមានការចម្រូងចម្រាសយ៉ាងខ្លាំង បើទោះជាអាជ្ញាធរមូលដ្ឋាន និងសមត្ថកិច្ចបានព្យាយាមជួយធ្វើការសម្របសម្រួលយ៉ាងណាក៏ដោយ ។
ក្រោយផ្ទុះឡើងនូវរឿងអាស្រូវខាងលើនេះ យុវជនជាកូនកំលោះ មានឈ្មោះសឹម បញ្ញា អាយុ១៩ឆ្នាំ រស់នៅភូមិជើងទឹក សង្កាត់ជើងទឹក ក្រុងព្រៃវែង បានបដិសេធថា មិនទទួលនារីរងគ្រោះជាកូនក្រមុំនោះទេ ដោយគ្រួសារខាងប្រុសក៏មិនអនុញ្ញាតឱ្យកូនកំលោះទទួលស្គាល់នារីរងគ្រោះជាប្រពន្ធដែរ មិនតែប៉ុណ្ណោះ បានទាមទារសំណងថ្លៃបណ្ណាការចំនួន១,៤០០ដុល្លារ ទៀតផង ។
លោក ពៅ ជីវី ស្នងការរងនគរបាលខេត្តព្រៃវែង បានអោយអ្នកសារព័ត៌មានដឹងថា ជនសង្ស័យបានសារភាពថា គេបានលួចស្រឡាញ់នារីជាកូនក្រមុំនោះយូរមកហើយ ប៉ុន្តែឪពុកម្តាយរបស់គេក្រីក្រពេក មិនហ៊ានចូលស្តីដណ្តឹងនាងនោះទេ ។ នៅថ្ងៃនារីរងគ្រោះចូលរោងការ គេបានលួចមើលនាង និងបុរសជាកូនកំលោះស្ទើរគ្រប់សកម្មភាពទាំងអស់ ព្រោះផ្ទះរបស់គេនៅក្បែរផ្ទះកូនក្រមុំ ។ លុះពេលឃើញនារីរងគ្រោះជាកូនក្រមុំចូលទៅក្នុងបន្ទប់របស់នាង ចំណែកកូនកំលោះនៅបន្តផឹកស៊ីជាមួយបងប្អូនសាច់ញាតិនៅក្រោមរោងការក្បែរផ្ទះ ឃើញឱកាសល្អ រូបគេក៏បន្លំខ្លួនជាកូនកំលោះ ចូលទៅរួមរ័កជាមួយកូនក្រមុំរហូតដល់បានសម្រេចរហូតដល់ទៅ៣ដង ហើយបន្តដេកលង់លក់ជាមួយនារីរងគ្រោះរហូតទៀបភ្លឺ ទើបស្ត្រីរងគ្រោះដឹង ហើយស្រែកហៅឪពុកម្តាយស្ទុះមកចាប់គេក្នុងបន្ទប់តែម្តង ។
ចំណែកឯលោក សៅ ចាន់ថា អធិការស្រុកកញ្ជ្រៀច បានបញ្ជាក់ថា ជនសង្ស័យត្រូវបានកម្លាំងសមត្ថកិច្ចបញ្ជូនទៅឃុំខ្លួនជាបណ្តោះអាសន្ន នៅក្នុងពន្ធនាគារខេត្តព្រៃវែង កាលពីល្ងាចថ្ងៃពុធ ទី១៧ មករា ២០១៧ ម្សិលមិញនេះតាមដីកាបង្គាប់ឱ្យឃុំខ្លួនបណ្តោះអាសន្នលេខ២១ ចុះថ្ងៃ១៧ ខែមករា ឆ្នាំ២០១៨ របស់លោកភា ជា ចៅក្រមស៊ើបសួរសាលាដំបូងខេត្តព្រៃវែង ដែលបានសម្រេចចោទប្រកាន់ពីបទ «រំលោភសេពសន្ថវៈ»ដោយផ្អែកលើមាត្រា២៣៩ នៃក្រមព្រហ្មទណ្ឌ ដែលអាចជាប់គុកពី៥ឆ្នាំ ទៅ១០ឆ្នាំ ។
ប្រភពពីមេភូមិឆ្ពឹស អ្នកស្រី លាត ឈាត បានអោយដឹងថា ក្រោយកើតរឿងរ៉ាវដ៏អាក្រក់នេះ ក្រុមគ្រួសារខាងកូនកំលោះ បានបដិសេធនារីរងគ្រោះ ជាកូនប្រសា និងមិនអនុញ្ញាតឱ្យកូនកំលោះដែលជាកូនប្រុសរបស់ពួកគេទទួលស្គាល់នារីរងគ្រោះជាប្រពន្ធឡើយ មិនតែប៉ុណ្ណោះបានទាមទារឱ្យខាងឪពុកម្តាយស្ត្រីជាកូនក្រមុំរងគ្រោះ សងថ្លៃបណ្ណាការចំនួន១,៤០០ដុល្លារថែមទៀត ។
អ្នកស្រី បន្តថា ករណីនេះយើងមានការអាណិតអាសូរចំពោះនារីរងគ្រោះជាកូនក្រមុំ និងក្រុមគ្រួសាររបស់នាងខ្លាំងណាស់ ព្រោះនេះជាក្តីអាម៉ាស់មួយដ៏ធំ ។ ឪពុកម្តាយខាងប្រុស បាននាំកូនប្រុសរបស់ពួកគេត្រឡប់ទៅស្រុកវិញ ដោយមិននិយាយស្តីអ្វីបន្ថែមឡើយ ក្រៅពីទារប្រាក់បណ្ណាការវិញចំនួន១,៤០០ដុល្លារ ។
ជុំវិញរឿងរ៉ាវលួចចូលផ្សំដំណេកជាមួយកូនក្រមុំ ដែលប្រៀបបានទៅនឹងអង្ករក្លាយជាបាយទៅហើយនោះ នារីរងគ្រោះជាកូនក្រមុំ មានឈ្មោះ ប.ស.ជ.ន អាយុ១៨ឆ្នាំ បានអះអាងថា មិនចង់ឱ្យរឿងអាស្រូវបែបនេះកើតឡើងទេ ប៉ុន្តែធ្វើម៉េច វាជារឿងដែលនឹកស្មានមិនដល់ ព្រោះកូនស្រីស្មានថា ជាប្តី ទើបប្រគល់ខ្លួនប្រាណសម្រាប់រាត្រីទឹកឃ្មុំ១យប់នេះ ។ លុះដឹងថា មិនមែនក៏បានស្រែកឆោឡោដែលនេះបានបញ្ជាក់ច្បាស់ថា កូនស្រីមានភក្តីភាពនឹងប្តី ដែលក្រាបសំពះក្បាលដល់កន្ទេល ដូច្នេះសូមអង្វរកឱ្យខាងប្រុសពិចារណា និងយោគយល់អនាគតប្រពន្ធថ្មីថ្មោងនៅក្មេងខ្ចីម្នាក់នេះផង ។
នៅចំពោះមុខសមត្ថកិច្ច យុវជនកំហូច មានឈ្មោះឈឺន ចាន់សេង អាយុ១៨ឆ្នាំ មុខរបរមិនពិតប្រាកដ មានលំនៅក្នុងភូមិកើតហេតុខាងលើ បានឆ្លើយសារភាពថា តាមពិតរូបគេបានលួចកួចចិត្តប្រតិព័ទ្ធលើនារីរងគ្រោះជាយូរមកហើយ ព្រោះរស់នៅជាប់របងផ្ទះគ្នា ឃើញមុខរាល់ថ្ងៃយូរទៅក៏បាក់ចិត្តស្រលាញ់ គ្រាន់តែមិនហ៊ានសារភាព។ ដឹងអី! ស្រីថ្លៃត្រូវប្រុសថ្មីចូលស្តីដណ្តឹង និងត្រូវឪពុកម្តាយយល់ព្រមលើកឱ្យរៀបការប្តីបាត់ ទើបធ្វើឱ្យរូបគេនឹកស្តាយក្រោយ លុះមកដល់ថ្ងៃសូត្រមន្តចូលរោងការ មានកម្មវិធីផឹកស៊ីរាំធុងបាស់ ហើយរូបគេក៏បានទៅឈរមើលគេរាំរែកដែរ លុះឃើញកូនក្រមុំឡើងទៅដេក ចំណែកកូនកំលោះនៅបន្តផឹកស៊ីរាំរែកនៅឡើយ ក៏បែកគំនិតឆ្លៀតឱកាសបន្លំខ្លួនធ្វើជាកូនកំលោះ លបចូលទៅក្នុងបន្ទប់សុំកូនក្រមុំផ្សំដំណេកជាមួយនាងតែម្តង ។ ប៉ុន្តែដោយសារចិត្តស្រលាញ់ស្រីថ្លៃលើសលប់ ទើបធ្វើឱ្យគេសម្រុកយ៉ាងខ្លាំង រហូតដល់បានសម្រេច៣ដង ក្នុងមួយយប់ ជាហេតុធ្វើឱ្យរូបគេបាក់កម្លាំង ដេកលក់ជ្រុលរហូតទល់ភ្លឺ ធ្វើឱ្យនារីរងគ្រោះ ជាកូនក្រមុំភ្ញាក់ពីដេកមុន ឃើញថា មិនមែនជាកូនកំលោះ ក៏ស្រែកឆោឡោផ្អើលដល់ក្រុមគ្រួសារ ចាប់ខ្លួនប្រគល់ឱ្យសមត្ថកិច្ចតែម្តង ៕
0 comments:
Post a Comment