ស្ត្រីអ្នកលក់នំបញ្ចុកម្នាក់បានទទួលរងគ្រោះថ្នាក់ដោយរបួសរលាកខ្លួនយ៉ាងដំណំ បន្ទាប់ពីស្ត្រីវ័យក្មេងអ្នកទិញម្នាក់បានគប់ថង់ទឹកសម្លនំបញ្ចុកដែលកំពុងក្តៅគគុកលើខ្លួន ខណៈរូបគេមិនបានអ្វីដូចដែលសុំពីអ្នកលក់ ។
បើតាមព័ត៌មានបានឱ្យដឹងថា ស្ត្រីវ័យក្មេងម្នាក់បានបញ្ជាទិញនំបញ្ចុកខ្ចប់ជាមួយទឹកសម្លហឹរសាច់ជ្រូក (សម្លការីសាច់ជ្រូក) ។ ទន្ទឹមគ្នានោះស្ត្រីអ្នកវ័យក្មេងអ្នកទិញបានស្នើសុំអ្នកលក់ឱ្យដាក់ទឹកសម្លក្នុងថង់ធំ និង សុំថែមទឹកសម្លឱ្យបានច្រើន ប៉ុន្តែសំណើនោះត្រូវបានអ្នកលក់បដិសេធដោយតបថាអត់មានថង់ធំជាងនេះទេ ។ រំពេចនោះកំហឹងស្ត្រីអ្នកទិញចាប់ផ្ទុះឡើង ហើយក៏បានទាញយកថង់ទឹកសម្លកំពុងក្តៅគគុកនោះគប់ទៅលើស្ត្រីអ្នកលក់ បណ្តាលឱ្យរងរបួសរលាកត្រង់-ក និង ដើមទ្រូងយ៉ាងដំណំ ។
ក្រោយហេតុការណ៍បានកើតឡើង មិត្តប្រុសស្ត្រីវ័យក្មេងចិត្តក្តៅនោះបានចូលខ្លួនមកដោះស្រាយក្នុងរឿងនេះ ដោយសុំសម្របសម្រួល និង ទទួលជូនទៅមន្ទីរពេទ្យ តែយ៉ាងណាស្ត្រីអ្នកលក់មិនយល់ព្រម ដោយគាត់ថានឹងទៅមន្ទីរពេទ្យដោយខ្លួនឯង ។ មិត្តប្រុសជនដៃដល់នៅតែធានាចេញថ្លៃពេទ្យជូនស្ត្រីអ្នកលក់ដដែល ដោយបានចំណាយអស់ ១០.០០០ បាត ស្មើនឹងជា ៣០០ ដុល្លារអាមេរិក ។ ទោះយ៉ាងណាស្ត្រីអ្នកលក់នៅតែមិនសុខចិត្ត ដោយពេលនេះបានដាក់ពាក្យបន្តឹងទៅប៉ូលិសដើម្បីចាត់ការស្ត្រីដៃដល់នោះតាមផ្លូវច្បាប់ ។
គួរបញ្ជាក់ដែរថា ស្ត្រីអ្នកលក់នោះមានឈ្មោះ Kham Loongtahរីឯស្ត្រីវ័យក្មេងជាជនដៃដល់មិនត្រូវបានស្គាល់អត្តសញ្ញាណឡើយ ហើយរឿងហេតុនេះបានកើតឡើងនៅទីក្រុងឈៀងមៃ ប្រទេសថៃ និង ព័ត៌មាននេះត្រូវបានចុះផ្សាយព្រោងព្រាត ហើយពេលនេះក៏កំពុងល្បីពេញបណ្តាញសង្គមផងដែរ ៕
0 comments:
Post a Comment