សាកសពម៉ាំមី ដែលគេប៉ាន់ស្មានថាមានអាយុកាល៩១៥ឆ្នាំ ពោលគឺបានស្លាប់កាលពីឆ្នាំ១១០០នៃគ្រិស្តសករាជ ត្រូវបានរកឃើញនៅក្នុងប្រអប់ឡាំងកាតុងមួយនៅពីមុខតំបន់កំណាយវត្ថុបុរាណមួយក្នុងទីក្រុង Trujillo ភាគខាងជើងឆៀងខាងលិចនៃប្រទេសប៉េរូ។
សាកសពនេះត្រូវបានប្រទះឃើញ នៅពេលអ្នកសំអាត មកបោសសម្អាតផ្លូវនៅជិតតំបន់កំណាយនោះ។
អ្នកសម្អាតឈ្មោះ Otilio Padilla Miramontes បានឲ្យដឹងថា៖ "វាមើលទៅហាក់ដូចជាប្រអប់ដែលគេបោះចោលតាមផ្លូវ ប៉ុន្តែពេលដែលខ្ញុំបើកវា ស្ទើរតែលោះព្រលឹងដោយឃើញលលាដ៍ក្បាលខ្មោចញញឹមស្មេញដាក់បែបនេះ ហើយភ្លាមៗខ្ញុំបានទូរសព្ទទៅប៉ូលិសដោយពុំគិតថានេះជាសាកសពមនុស្សបុរាណនោះទេ"។
ទន្ទឹមនឹងនេះដែរ មន្ត្រីប៉ូលិសដែលជាអ្នកនាំពាក្យបាននិយាយថា៖ "ភ្លាមៗនោះពួកយើងបានបង្ហាញថានេះពុំមែនជាឆ្អឹងសាកសពថ្មីៗនោះទេ ប្រហែលជាមាននរណាម្នាក់ព្យាយាមលួចវា ហើយយើងកំពុងតែរកមូលហេតុដែលគេទុកវានៅក្រៅតំបន់កំណាយបុរាណនោះ"។
គេបានគិតថាសាកសពមួយនេះត្រូវបានគេលួចយកពីតំបន់បុរាណឈ្មោះថា Chan Chan ដែលជាទីក្រុងអរិយធម៌បុរាណនៃចក្រភព Chimu នៅតាមឆ្នេរសមុទ្ររបស់ជនជាតិប៉េរូ តាំងពីឆ្នាំ១១០០។ យ៉ាងណាក្ដី អ្នកនាំពាក្យនៅទីនោះបានបញ្ជាក់ថានេះមិនមែនជាសាកសពសម័យ Chimu នោះទេ តែវាជាសាកសពរបស់ជនជាតិអេស្ប៉ាញដែលចូលមកតាំងពីសម័យមុន៕
0 comments:
Post a Comment