សត្វមាន់ជល់ អាយុ ១៦ ខែមួយក្បាល ដែលមានកំណត់ត្រាជល់ឈ្នះ ៣ ដងជាប់គ្នា ត្រូវបានគេលក់ក្នុងតម្លៃរហូតដល់ទៅ ១ លានបាត ឬជិត ៣០ ០០០ ដុល្លារ។
ក្រុមអ្នកនិយមការជល់មាន់ បាននាំគ្នាធ្វើដំណើរយ៉ាងអន្ទះអន្ទែង ទៅកាន់កសិដ្ឋានចិញ្ចឹមមាន់ជល់ Sum-an នៅក្នុងស្រុក Saraphi ប្រទេសថៃ ដើម្បីធ្វើជាសាក្សីក្នុងការលក់មាន់ជល់រោមមាស ជាពូជកូនកាត់ថៃ-មីយ៉ាន់ម៉ា Phama Mahwing។
ម្ចាស់កសិដ្ឋានឈ្មោះ Charnnarong Chuenjit អាយុ ៣៦ ឆ្នាំ បានឲ្យដឹងថា មាន់ជល់ពិសេសនេះមានទម្ងន់ ២,៦ គីឡូក្រាម និងជាមាន់ជល់មួយ ក្នុងចំណោម មាន់ជល់ចំនួន ៥០ ក្បាលរបស់លោក។ លោក Charnnarong បានទិញវាក្នុងតម្លៃ ៨០ ០០០ បាត ឬ ២ ៣០០ ដុល្លារ ដោយពេលនោះវាមានអាយុមិនដល់ ១ ឆ្នាំឡើយ។
លោក Charnnarong បានបញ្ជាក់ប្រាប់ថា តម្លៃខ្លួនរបស់វាបានកើនឡើង បន្ទាប់ពីវាបានឈ្នះការប្រកួត ចំនួន ៣ លើកជាប់គ្នា។ ដំបូងឡើយ មានគេឲ្យតម្លៃវាត្រឹមតែ ៥០០ ០០០ បាត ឬ ១៤ ០០០ ដុល្លារប៉ុណ្ណោះ តែត្រូវលោកបដិសេធមិនព្រមលក់។ ក្រោយមក មានគេហ៊ានឲ្យតម្លៃវា ដល់ទៅ ១ ០០០ ០០០ បាត ឬជិត ៣០ ០០០ ដុល្លារ ទើបលោកសម្រេចចិត្តលក់វាតែម្ដង។
គួរបញ្ជាក់ថា ម្ចាស់ថ្មីហ៊ានចំណាយលុយខ្ទង់ម៉ឺនដុល្លារ ទិញមាន់ជល់ពិសេសមួយក្បាលនេះ មានឈ្មោះថា Seksan Nanta អាយុ ៣០ ឆ្នាំ ជាម្ចាស់កសិដ្ឋានចិញ្ចឹមមាន់ជល់ Sirikanya ស្ថិតនៅក្នុងស្រុក Saraphi ដូចគ្នា។
លោក Seksan បានប្រាប់ឲ្យដឹងថា លោកបានមើលការប្រកួត ទី ២ និង ទី ៣ របស់វា ហើយចាប់អារម្មណ៍លើស្ទីលជល់ និងចង់ទិញវាតែម្ដង។ ជាចុងក្រោយ លោកបានបន្ថែមឲ្យដឹងទៀតថា លោកនឹងយកវាទៅប្រជល់ជាមួយមាន់ដទៃទៀត ប៉ុន្តែគោលបំណងសំខាន់របស់លោក គឺប្រើវាដើម្បីបង្កាត់ពូជ ជាមួយមេមាន់ពូជមីយ៉ាន់ម៉ា តម្លៃ ៤ ០០០ ០០០ បាត ឬ ១១០ ០០០ ដុល្លារ ដែលលោកមានស្រាប់៕
0 comments:
Post a Comment