កាលពីព្រលឹមស្រាងៗ ខណៈដែលកម្មការិនីម្នាក់មិនទាន់ក្រោកពីដេកនៅឡើយ ស្រាប់តែមានពស់ថ្លាន់ធំ១ក្បាល ទម្ងន់ប្រមាណ២០គីឡូក្រាម លូនចូលទៅក្នុងបន្ទប់ដេករបស់នាង បង្កឱ្យប្រជាពលរដ្ឋដែលជាអ្នកជិតខាងនាំគ្នាទៅចោមរោមមើលគ្រប់ៗគ្នា កាលពីវេលាម៉ោង០៥ និង១៥នាទីព្រឹកថ្ងៃទី៧ តុលា ស្ថិតក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ប៉ុន្តែខណៈនោះ គ្មានអ្នកក្លាហានហ៊ានចូលទៅចាប់ពស់ថ្លាន់នេះទេ ទោះបីដឹងថា ពស់ថ្លាន់គ្មានពិសក៏ដោយ បន្ទាប់មក ត្រូវគេបានរាយការណ៍ជូនអាជ្ញាធរភូមិ ដើម្បីបន្តដំណឹងនេះ ទៅកាន់អាជ្ញាធរសង្កាត់ និងខណ្ឌ ឱ្យចាប់ពស់នេះ យកទៅរក្សាទុករង់ចាំប្រគល់ជូនបន្តទៅឲ្យខាងក្រុមអភិរក្សសត្វព្រៃ មន្ត្រីរដ្ឋបាលព្រៃឈើ យកទៅដាក់នៅសួនសត្វ ឬទីកន្លែងណាមួយ។
ប្រជាពលរដ្ឋបាននិយាយថា ពស់ថ្លាន់១ក្បាលនោះ មានទំហំដងខ្លួនធំ និងមានប្រវែងប្រហែលជាង៤ម៉ែត្រ ដែលតាមការប៉ាន់ស្មានមានទម្ងន់ប្រមាណ២០គីឡូក្រាម ដែលវាអាចរឹតរួតសម្លាប់និងលេបមនុស្ស ឬសត្វផ្សេងៗបានយ៉ាងងាយ ។ ម្យ៉ាងទៀត មិនមាននរណាម្នាក់បានដឹងថា ពស់១ក្បាលនេះ បានលូនចូលទៅក្នុងបន្ទប់ជួលដេករបសើនាងកម្មការិនីម្នាក់នោះ តាំងពីពេលណានោះទេ ហើយនាងម្ចាស់បន្ទប់នោះ ក៏មិនត្រូវបានស្គាល់ឈ្មោះដែរ ដែលនាងពិតជាមានការភិតភ័យខ្លាំងណាស់ ហើយក្រោយពេលកើតហេតុនាងបានទៅធ្វើការរោងចក្របាត់ហើយ។
ប្រភពដដែលបន្តថា នាងកម្មការិនីម្នាក់នោះ បានស្នាក់នៅក្នុងបន្ទប់ជួលខាងលើតែម្នាក់ឯង គ្មានអ្នកស្នាក់នៅជាមួយឡើយ ហើយនៅមុនពេលមានការភ្ញាក់ផ្អើលកើតឡើង ខណៈពេលដែលនាងកំពុងដេកមិនទាន់ក្រោក ស្រាប់តែមានកំប៉ុងថ្នាំមួយជ្រុះធ្លាក់ពីលើតុមកលើឥដ្ឋការ៉ូ ធ្វើឱ្យនាងភ្ញាក់ពីដំណេក ៕
សូមទស្សនាវីដេអូ៖
0 comments:
Post a Comment