ដោយ៖ សុផាន់ម៉ៃ
លោកតាអាចារ្យសេះ ង៉ុយ អ្នកថែរក្សានៅអាស្រមលោកយាយម៉ៅ រំលឹករឿងមួយគួរឲ្យញាក់សាច់ថា មុននេះនៅពីមុខអសនៈយាយម៉ៅពេជ្រនិល មានបុរសម្នាក់ និងស្ដ្រីម្នាក់់មានវ័យស្របាលគ្នាខ្ទង់៤០ឆ្នាំប្លាយនាំគ្នាលុតជង្គង់ ហើយលើកដៃសំពះប្រណម្តដោយខាងប្រុសបន្លឺតិចៗថា ប្រសិនបើខ្ញុំបានប្រព្រឹត្តនូវអំពើដូចគេចោទប្រកាន់មែននោះ សូមបារមីលោកយាយម៉ៅកាច់ខ្ញុំចុះ! ចំណែកខាងស្ដ្រីវិញក៏បានពោលដែរថា បើខ្ញុំចោទប្រកាន់គេខុសក៏សូមបារមីលោកយាយម៉ៅ ដាក់ទណ្ឌកម្មខ្ញុំបែបណាក៏ដាក់ចុះ!។
ក្រោយពីបុរស និងស្ដ្រីនោះឧទ្ទិសចប់មិនបានក្រោកឈរផង ស្រាប់តែបុរសនោះដួលដាច់ផ្ងាមកក្រោយប្រកាច់បែបពពុះមាត់ស្គុលដូចកើតជម្ងឺឆ្កួតសន្លប់ស្ដូកស្ដឹង ធ្វើឲ្យអ្នកដំណើរឯទៀតៗដែលមកអុជធូបក្បែរៗនោះភ្ញាក់ផ្អើលយ៉ាងខ្លាំង។ អ្នកខ្លះបានយកប្រេងកូឡាមករឹតលាប ខ្លះជួយគក់ច្របាច់ដោយគិតថាបុរសនោះទំនងជាកើតជម្ងឺខ្យល់គ។
ទោះបីជាមានការជួយរឹតរួតគក់ច្របាច់យ៉ាងណាក្ដី ក៏បុរសនោះមិនបានដឹងខ្លួននោះឡើយ។ នៅក្នុងខណៈនេះដែរលោកតាម្នាក់ដែលប្រចាំការនៅដំណាក់យាយម៉ៅពេជ្រនិល បានលើកដៃសំពះស្ដ្រីនោះសុំឲ្យនាងជួយនិយាយអង្វរកដល់លោកយាយម៉ៅលើកលែងទោសដល់បុរសរូបនោះផង។ អេះអុញមួយសន្ទុះស្ដ្រីនោះក៏ចាប់ធូបបីសរសៃអុជភ្លើង សុំឲ្យលោកយាយម៉ៅឈប់ប្រកាន់ខឹងចំពោះបុរសរូបនោះ ។ ក្រោយពីបែបន់បានមួយកំណាត់ភ្លើងធូប បុរសនោះក៏ដឹងខ្លួនឡើងវិញ។
តាអាចារ្យរូបនេះបន្ដថា កន្លងៗមកក៏ធ្លាប់មានអ្នកមកស្បថស្បែពីរឿងរ៉ាវផ្សេងៗដែរ ប៉ុន្ដែខ្ញុំពុំបានដឹងថា ពួកអ្នកមកស្បថទាំងនោះ បានសម្រេចតាមបំណងប្រាថ្នា ឬយ៉ាងណានោះទេ គឺទើបតែលើកដំបូងនេះហើយដែលខ្ញុំបានឃើញបារមីលោកយាយម៉ៅបញ្ចេញមហិទ្ធិឫទ្ធិឲ្យឃើញទាន់ហន់បែបនេះ ។ ជាមួយជំនឿរបស់ប្រជាជនមកលើមហិទ្ធិឫទ្ធិរបស់លោកយាយម៉ៅ លោកតា សេះ ង៉ុយ បាននិយាយថា មហិទ្ធិឫទ្ធិរបស់លោកយាយាម៉ៅនេះ មិនមែនតែប្រជាជនខ្មែរយើងទេដែលមានជំនឿ សូម្បីតែជនបរទេសដែលធ្វើដំណើរឆ្លងកាត់ទីនេះក៏មានជំនឿដែរ។
លោកអាចារ្យ ឃឹត ឌួង ដែលថែរក្សានៅអាស្រមលោកយាយ ម៉ៅ និយាយថា អ្នកធ្វើដំណើរជាតិនិងអន្ដរជាតិ ដែលបានឆ្លងកាត់ទីនេះ តែងតែឈប់ដើម្បីអុជធូបសុំសេចក្ដីសុខសប្បាយ ហើយអ្នកខ្លះទៀតនោះ ទោះមិនបានចុះមកអុជធូបក៏ដោយ ក៏អ្នកនោះបាននឹកក្នុងចិត្តដែរ។ ម្យ៉ាងវិញទៀត បើយើងមិនគោរពយ៉ាងម៉េចក៏ដោយ កុំតែមាត់ឡូឡាថាអញ្ចេះអញ្ចុះពិតជាមិនមានបញ្ហាកើតឡើងនោះឡើយ។
ចំពោះអ្នកអុជធូបក៏អញ្ចឹងដែរ អុជហើយរៀបចំដាក់ឲ្យស្រួលកុំបោះបោក គឺមិនបានទេស៊ូកុំអុជល្អជាង ដូចកាលពីពីរខែមុននេះ មាននារីម្នាក់បើកឡានមកមិនចុះអុជធូប ហើយថែមទាំងស៊ីផ្លេខ្លាំងៗដាក់ឡានខាងមុខឲ្យចៀសរួចក៏បើកចេញទៅមិនបាន២គីឡូម៉ែត្រផង ឡាននោះក៏ក្រឡាប់ដោយគ្មាននរណាដឹងពីមូលហេតុច្បាស់នោះទេ។ ហើយនៅលើដងផ្លូវជាតិលេខ៤នេះប្រហែលជាមានប្រជាជនជាច្រើនបានដឹងហើយចំពោះអ្នកដែលល្មើសមួយចំនួនត្រូវបានរងគ្រោះថ្នាក់មិនតិចទេនៅតំបន់នេះ។
• ប្រសិនបើអ្នកណាពេលភ័យបន់ដំរីពេលផុតភ័យថ្វាយពងមាន់គឺច្រើនតែមានរាសីមិនល្អ
តាមគេសម្គាល់មើលមនុស្សជាច្រើនដែលបានបន់ស្រន់ ឬបួងសួងសុំឲ្យបារមីលោកយាយម៉ៅជួយ គឺតែងតែទទួលបានជោគជ័យដូចក្ដីបំណង។ ប៉ុន្ដែពួកគេធ្វើឡើងបានជោគជ័យបែបនេះ លុះណាក្នុងបំណងល្អ មិនប្រព្រឹត្តអំពើទុច្ចរិតទើបស័ក្ដិសិទ្ធ។ ប៉ុន្ដែដើម្បីបានសុខយូរអង្វែងរហូតទៅ លុះណាពួកគេកាន់មាត់សច្ចៈនិយាយអ្វីត្រូវធ្វើនឹងបើពុំដូច្នេះទេ ពួកគេជួបសំណាងល្អមិនយូរទេ។
• ពីអតីតកាលលោកយាយម៉ៅ ទទួលសំណែនយ៉ាងចម្លែក(ដង្វាយលិង្គសិប្បនិម្មិត)
កាលពីប៉ុន្មានឆ្នាំមុនមានមនុស្សជាច្រើន ក្រោយពីធ្វើការបួងសួងបានសម្រេចរឿងអ្វីមួយហើយ ពួកគេតែងតែមកដាក់ដង្វាយផ្សេងៗ។ ក្នុងនោះក្រៅពីដង្វាយផ្លែឈើ មាន់ស្ងោរ ក្បាលជ្រូក ភេសជ្ជៈផ្សេងៗ ឬអសនៈ(អាស្រមរានទេវតា) គឺគេច្រើនដាក់ដង្វាយលិង្គសិប្បនិម្មិត្ត។ លិង្គនេះតាមគេរាប់ចំនួនគឺមានមិនតិចជាង់៧០០០លិង្គនោះឡើយ។
• លោកយាយលែងទទួលដង្វាយលិង្គ ព្រោះឮថាកាន់សីល
មន្ត្រីយោធាម្នាក់ជាប្រធានបូនីយដ្ឋាន លោកយាយម៉ៅ ពេជ្រនិល លើកថា ប៉ុន្មានឆ្នាំមកនេះលោកយាយម៉ៅ កាន់សីល ហើយលោកយាយលែងទទួលដង្វាយលិង្គដូចកាលពីមុនៗទៀតហើយ។ លោកបានលើកថា បានជាដឹងថា លោកយាយម៉ៅកាន់សីល ព្រោះកន្លងមកបារមីលោកយាយម៉ៅ បានសណ្ឋិតចូលលរូបអ្នកស្រុក ហើយប្រាប់ថា លោកយាយលែងត្រូវការលិង្គទៀតហើយ លោកយាយត្រូវការតែដង្វាយចេក ភេសជ្ជៈ ផ្លែឈើ ឬមាន់ស្ងោរ ក្បាលជ្រូក។ល។
តាមដឹងលិង្គសិប្បនិម្មិតជាង៧០០០គ្រឿងដែលគេយកទៅថ្វាយលោកយាយកាលពីប៉ុន្មានឆ្នាំមុននេះ ត្រូវបានគេយកចេញពីអាស្រមលោកយាយអស់ហើយ ដោយគេយកទៅជីកកប់នៅក្បែរអសនៈនោះ ។ ប៉ុន្ដែយ៉ាងណាក៏ដោយលោកតាអាចារ្យម្នាក់ប្រាប់ថា ខ្ញុំជឿថាលោកយាយពុំទាន់កាន់សីលទេ បើកាន់សីលតើបារមីលោកយាយអាចជួយមនុស្សលោកពីគ្រោះអាក្រក់យ៉ាងណាទៅ។ ខ្ញុំគិតថាថ្នាក់លើបានឧបកិច្ចដើម្បីកុំឲ្យមនុស្សយកដង្វាយលិង្គមកថ្វាយទៀត ព្រោះវាពុំសមភ្នែកភ្ញៀវជាតិ និងអន្ដរជាតិ។ ប៉ុន្ដែយ៉ាងណាក៏ដោយ ការដង្វាយរបស់ផ្សេងៗក្រៅពីលិង្គក៏ម្យ៉ាងដែរហើយអ្វីៗយើងអាចឧបកិច្ចបាន។
• តើមានប្រវត្តិយ៉ាងណាបានលោកយាយម៉ៅត្រូរការដង្វាយលិង្គពីមុនមក
តាមការស្ដាប់ការនិទានប្រវត្តិលោកយាយម៉ៅ គឺមានការលើកឡើងនូវប្រវត្តិផ្សេងៗគ្នា ប៉ុន្ដែមានប្រវត្តិខ្លះហាក់ដូចជាស្របគ្នានឹងរឿងតែមួយដែរ។ ប្រវត្តិនិទានខ្លះលើកថាលោកយាយម៉ៅ មានស្រុកកំណើតខេត្តរោងដំរីកម្ពុជាក្រោម ហើយគាត់មកខេត្តកោះកុងរកស្វាមីគាត់ឈ្មោះ គ្រី ជាអ្នកជំនួញ ដែលចេញពីផ្ទះបាត់យូរខែឆ្នាំ។ ប៉ុន្ដែពេលជួបស្វាមី លោកតាគ្រី បែរជាមានស្រីកំណាន់ថ្មី។ ពេលនាំតាគ្រីមកស្រុកកំណើតតាមសំពៅដល់កណ្ដាលសមុទ្យ លោកយាយម៉ៅឲ្យតាគ្រីស្បថថា គាត់មានស្រីថ្មីឬអត់។ ដើម្បីកុំឲ្យភរិយាដឹងតាគ្រី ស្បថទាំងបំពាន។
ហេតុការណ៍ទាន់ហន់នោះ ស្រាប់តែព្យុះបោកបក់ធ្វើឲ្យសំពៅទាំងឡាយរកកលនឹងលិច។ លោកយាយឃើញស្ថានភាពបែបនេះ ក៏បួងសួងថា ដោយសារតែរឿងគាត់ អ្នកផ្សេងៗមិនត្រូវស្លាប់ទេ។ គាត់ថាគាត់សុខចិត្តស្លាប់ដើម្បីអ្នកដំណើរទាំងអស់រស់។ លោកយាយម៉ៅ បួងសួងថា បើគាត់ស្លាប់ សូមឲ្យបារមីគាត់ក្លាយជាអ្នកថែរក្សាមនុស្សលោក។ គ្រាន់តែគាត់លិចចូលទឹកមួយសន្ទុះ ស្រាប់តែព្យុះសង្ឃរាបានស្ងប់ស្ងាត់ ហើយអ្នកដំណើរទាំងអស់ដឹងគុណលោកយាយម៉ៅ។ ពួកគេគិតថា មុនការស្លាប់លោកយាយម៉ៅ ធ្វើដំណើរទៅរកស្វាមី គឺដើម្បីសេចក្ដីស្នេហា។ ដូច្នេះអ្វីដែលតំណាងឲ្យសេចក្ដីស្នេហា គឺមានតែនាំគ្នាថ្វាយលិង្គជានិម្មិតរូបស្វាមីនាង។
ប៉ុន្ដែអ្នកពេជ្រនិលនាំគ្នានិយាយថា មានហេតុការណ៍មួយទៀត គឺបារមីលោកយាយម៉ៅចូលសណ្ឋិតគាត់ប្រាប់ថា លោកយាយម៉ៅ ជាមេទ័ពស្ដ្រីក្រមុំដ៍អស្ចារ្យទី២ ក្នុងចំណោមកំពូលមេទ័ពទាំង១២នៅក្នុងនគរខ្មែរ។ នៅសមរភូមិភាគនិរតី នៃប្រទេស លោកយាយម៉ៅ មានយុទ្ធសាស្ដ្រ និងយុទ្ធសិល្ប៍ដ៍អស្ចារ្យក្នុងការវាយសៀមឈ្លានពានឈ្នះគ្រប់សមរភូមិ ហើយការពារបានទឹកដីប្រទេសភាគជួរសមុទ្រទាំងអស់ ។ កូនទាហានទាំងឡាយមានភក្ដីភាពចំពោះគាត់យ៉ាងខ្លាំង។ ចំណេរក្រោយមកគាត់ធ្លាក់ខ្លួនឈឺជាទម្ងន់ពុំអាចព្យាបាលបាន គាត់បានផ្ដាំផ្ញើកងទ័ពទាំងអស់ការពារដែនដីយើងកុំតក់ស្លុតឲ្យសោះ។
នៅពេលគាត់ស្លាប់ទៅព្រលឹងរបស់គាត់នៅការពារដែនដី និប្រជាពលរដ្ឋទាំងអស់គ្រប់ពេលវេលា។ ពលទាហានដែលសុទ្ធតែប្រុសៗទាំងអស់ក៏នាំគ្នាធ្វើអាស្រមដើម្បីដួងវិញ្ញាណក្ខ័ន្ធជំទាវមេទ័ពម៉ៅ ជួយតាមថែរក្សាការពារ។ ហើយដើម្បីជាភក្ដីភាពដ៍ស្មោះត្រង់បំផុតចំពោះមេទ័ព ពួកគេបានបូជាលិង្គគ្រប់ៗគ្នា(បូជាលិង្គដោយឧបកិច្ច ប្រើស្លឹកម្លូរយកមកអូសកាត់លិង្គ ហើយមូរស្លឹកម្លូរ ដោយសន្មត់ថា ជាលិង្គ ហើយដាក់សែន)។ ព្រោះថា ពួកទាហានទាំងនោះគ្មានអ្វីតំណាងឲ្យបុគ្គលពួកគេក្រៅពីលិង្គនេះទេ។
តាមគេវិភាគមើល គឺការដាក់ដង្វាយលិង្គចំពោះលោកយាយម៉ៅនេះ មិនមែនឲ្យលោកយាយសប្បាយតាមតម្រេកតណ្ហាទេ។ កាតដង្វាយលិង្គគឺជាប្រវត្តិនៃកងទ័ពដែលសុទ្ធតែជាបុរសៗក្នុងការសម្ដែងការគោរពស្មើនឹងជីវិត។
នៅប្រទេសកម្ពុជា ខាងជំនឿលើព្រហ្មញ្ញសាសនាក៏មានការគោរព”លិង្គ និងយោនី”យ៉ាងខ្លាំងកន្លងមកដែរ ដែលតំណាងឲ្យអ្នកមានគុណ និងតំណាងឲ្យភេទនៃបុគ្គលអច្ឆរិយៈផ្សេងៗដែរ។ ដូច្នេះការដាក់ដង្វាយនេះពុំមានអ្វីប្លែកនោះទេ៕
ប្រភព៖ khmerapsara.news
0 comments:
Post a Comment