ខេត្តស្វាយរៀង៖ មានលោកសង្ឃជាចៅអធិការវត្ត២វត្តផ្សេងគ្នា ហេតុតែចង់សប្បាយភ្លើតភ្លើនភ្លេចគិតខ្លួនជាសង្ឃដោយនាំគ្នាដោះស្បង់ចីពរ ប្ដូរស្លៀកពាក់ស៊ីវិលរួចធ្វើដំណើរតាមរថយន្តចូលហាងខារ៉ាអូខេ នៅក្រុងបាវិតរហូតដល់ទៀបភ្លឺទើបត្រឡប់ចូលវត្តវិញ ដោយប្រញាប់ពេក ក៏រេចង្កូតបុកបង្គោលភ្លើង ហើយធ្លាក់ចូលទឹកស្រះខាងមុខសាលាមឋមសិក្សា ហ៊ុន សែន អូវ៉ាងកាលពីថ្ងៃទី២៧ ខែកញ្ញា ឆ្នាំ២០១៧ វេលាម៉ោង០៣:៣០នាទីទៀបភ្លឺនៅ លើផ្លូវជាតិលេខ១ចន្លោះគីឡូម៉ែត្រលេខ ១៦ ទៅ ១៦២ ស្ថិតក្នុងភូមិតាបឹប សង្កាត់បាវិត ក្រុងបាវិត ខេត្តស្វាយរៀង បណ្ដាលឲ្យសុគតចៅអធិការ១អង្គ និងរបួសធ្ងន់ស្រាល ៤អង្គ/នាក់។
ប្រភពព័ត៌មានពីសមត្ថកិច្ចបានឲ្យដឹងថា ព្រះសង្ឃដែលជិះក្នុងរថយន្តទាំងនោះមានព្រះនាម គីម ហ៊ា (សុគត) មានព្រះជន្ម៣៥ឆ្នាំ ជាចៅអធិការវត្តគ្រួស ឃុំគ្រួស ស្រុកស្វាយជ្រំ និងព្រះនាម ស៊ឹម ភុន ព្រះជន្ម៣៤ ឆ្នាំ ជាចៅអធិការវត្តក្រសាំងជ្រំ ឃុំគ្រួស ស្រុកស្វាយជ្រំ ស្លៀកពាក់ស៊ីវិល និង២នាក់ទៀតសង្ស័យជាលោកសង្ឃនៅខេត្តផ្សេងហើយ ក្លែងភេទជាប្រជាពលរដ្ឋ ដើម្បីចង់សប្បាយហ៊ឺហា។
ប្រភពដដែលបានឲ្យដឹងទៀតថា មុនកើតហេតុមានរថយន្តម៉ាក CAMRYពណ៌សពាក់ស្លាកលេខ ភ្នំពេញ2C-5920 បើកបរដោយឈ្មោះ គឹម ហ៊ា ភេទប្រុស អាយុ ៣៤ឆ្នាំ ជនជាតិខ្មែរមានទីលំនៅភូមិគ្រួស ឃុំគ្រួស ស្រុកស្វាយជ្រំ ខេត្តស្វាយរៀង និងនាក់រួមដំណើរ០៤នាក់មាន ទី១ឈ្មោះ ជា ចន្ទោ ភេទប្រុស អាយុ ២៨ឆ្នាំ ជនជាតិខ្មែរ មុខរបរកសិករមានទីលំនៅភូមិបុស្សលាវ ឃុំបុស្សលាវ ស្រុកក្រចេះ ខេត្តក្រចេះ។ ទី២ ឈ្មោះ ជា ណាវឿន ភេទប្រុសអាយុ៣៤ឆ្នាំ ភេទប្រុស ជនជាតិខ្មែរ មុខរបរកសិករ រស់នៅភូមិកញ្ចំ ឃុំកញ្ចំ ស្រុកពារាំង ខេត្តព្រៃវែង និង០២នាក់ទៀតមិនស្គាល់ឈ្មោះ ដោយធ្វើដំណើរពីកើតទៅលិច ក្នុងល្បឿនលឿន ព្រោះប្រញាប់ចូលវត្តវិញកុំឲ្យភ្លឺទាន់ ស្រាប់តែរេចង្កូតទៅបុកបង្គោលភ្លើង រួចធ្លាក់ចូលស្រះទឹក បណ្ដាលអោយអ្នកបើកបរស្លាប់ នៅនឹងកន្លែងតែម្ដង។
បច្ចុប្បន្ន សពប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករងរបួសកំពុងព្យាបាលនៅមន្ទីរសំរាកព្យាបាលផាសុកភាព២ បាវិត។រីឯវត្ថុតាងរថយន្តសមត្ថកិច្ចយើងកំពុងស្ទូចយកមករក្សាទុកនៅអធិការដ្ឋាននគរបាលក្រុងបាវិតដើម្បីបំពេញសំណុំរឿងតាមនីតិវិធីនៃច្បាប់៕
0 comments:
Post a Comment